ازيكوا؟ انهارده هقولكم رأيي في غسول الوجه ناتري. انا بستعمله بقالي شهر و حبيت اتكلم عنه عشان لو حد محتار يجيبه ولا لأ.
أولا انا بشرتي مخطلتة. دهنية في نص الوش لكن جافة حوالين البوء. معنديش حب شباب ولا حاجة.
اهم حاجة تتعرفي علي نوع بشرتك عشان تعرفي هتجيبي انهي غسول. الغسول ده مش لبشرة معينة. و بعد كدة تتعرفي علي مكونات الغسول. انا بفضل المكونات تكون طبيعية اكتر من الكيميائة. مش شرط تكون دايما الكيميائة مضرة بس انا بفضل عموما المنتجات
الطبيعية.
دي مكونات الغسول..
الغسول مش ١٠٠٪ طبيعي لكن مكوناته بسيطة اوي و معظمها طبيعي ودي اكتر حاجة لفتت انتباهي فيه. مبحبش اجيب منتجات للبشرة معرفش اقري مكوناتها او تكون مليانة كيماويات عشان ممكن تسبب تهيج للبشرة و احمرار و احتمال تظهر حبوب كمان.
المكونات:
° كبريتات الزنك ZnSo4
° بانثينول - جلسرين بيحافظوا علي نضارة و نعومة البشرة
°حمض الصفصاف و ده مهم لمكافحة الحبوب و طرطيب البشرة
°زيت شجرة الشاي
°خلاصة الزعتر
ال PH level متوازنة في الغسول يعني مش حمضي (acidic) اوي عشان ما يضرش البشرة. بستعمله قبل ما انام و مبحتاجش اني استعمل كتير لأن القليل منه بيعمل رغوة كتيرة و كدة بيفضل لوقت اطول. عمومة مبحتاجش اني استعمل مرطب بعديه بس في الاماكن الجافة. انا عموما بفضل استعمل مرطب دايمااااا بعد غسل الوش و قبل النوم بالذات عشان اصحي ببشرة نضرة.
الغسول عموما مالوش ريحة معينة. هو ريحته شبه ريحة الصابون. حاجة واحدة بس بتضايقني فيه انه بيحتاج وقت اكتر عشان يتشال يعني بغسله بالمايه كذا مرة عشان اشيله
لكن غير كدة انا و ماما و اختي بنستعمله و انا شايفاه كويس.
بالنسبة للحبوب، زي ما قلت انا معنديش حب شباب لكن اختي عندها و ملاحظة تحسن.
سعره كان تقريبا ٣٥ جنيه ممكن تلاقوه في الصيدليات او السوبرماركتس
لو في غسول عاجبك قوليلي بتستعملي ايه في الكومنتس
ريم
