♥ ازيكوا
انهاردة هكلمكم عن مجموعة مرطبات اليدين من أماندا
دي مجموعة جديدة نزلت من فترة قصير في محلات الميكب والعناية بالبشرة
موجود منها 3 أنواع: مرطب للبشرة الحساسة (لونه وردي) مرطب لكل أنواع البشرة (لونه برتقالي) ومرطب للبشرة شديدة الجفاف (لونه لبني)
أنا عندي النوعين دول بس. مجربتش اللي للبشرة الجافة لسة لكن عايزة أجربه لأنه بزبدة الشيا وأنا بحب أستعمل المرطبات اللي بزبدة الشيا خصوصا في الشتا
مرطب لجميع أنواع البشرة 🍊
الكريم البرتقالي ده لكل انواع البشرة بس اللي عاجبني فيه انه بيحمي من أشعة الشمس الضارة بسبب وجود
SPF10 في المرطب
هي صحيح حماية ضعيفة لكن كام حد بيفكر انه يحمي جلد إيديه قبل ما يتعرض للشمس؟
بسبب دراستي للصيدلة عندي اعتقاد انهم أضافوا جزء الحماية من الشمس ده لان الكريم يحتوي على
vitamin C & خلاصة البرتقال
ودول مكونات بتزود حساسية الجلد للشمس فا فكرة حلوة جدا اضافة
SPF
مكتوب انه لجميع أنواع البشرة (الدهنية والجافة والعادية) لكن أنا مانصحش أي حد بشرته حساسة (ممكن تبقى بشرتنا أي نوع من التلاتة دول وكمان حساسة) يستعمل النوع ده (حتى لو بيحب ريحة البرتقان لأن ريحة الكريم ده برتقان واضح أوي ودي ميزة طبعا لأي حد بيحب الريحة دي)
في بقي النوع التاني وده مناسب للبشرة الحساسة 🌷
ده ريحته ماء ورد واضحة وبتستمر شوية بعد الاستخدام لكن بعد كدة بتروح (ودي حاجة كويسة لاني مش بحب ريحة ماء الورد). حبيت الكريم ده بالذات لأنه مش معقد, هو كريم مرطب مش تقيل ولا خفيف, قوامه مناسب للاستخدام اليومي. شايفة انه من الكريمات اللي ينفع نستخدمها على طول بعد غسل الايدين عشان نحافظ على رطوبتها. كمان حجمه مش كبير أوي فا بقدر اخده معايا في شنطتي ولانه مش في علبة بغطا مثلا, سهل أحافظ على الكريم نضيف ومش محتاجة احفظه في حتة معينة لان علبته بتقوم بالدور ده. اللي جرب الكريمات اللي بتكون في علبة زي دي طبعا فاهم اقصد ايه
الحجم بالنسبة للسعر مناسب جدا خصوصا مقارنة بكريمات تانية موجودة في السوبرماركت. لو بتفكروا تجربوا المجموعة دي أنصحكم بالكريم البمبي, لأنه بيمتص على طول ومش بيسيب لمعه على الإيد
البرتقالي بيمتص بسرعة لكن بيسيب طبقة لامعة على الايد. أنا شخصيا مش بتضايقني بس أختي محبتش الكريم بسببها. أما لو بشرتكوا جافة جربوا الكريم التالت وقولولي رأيكوا بقى عشان أنا مجربتوش لسه
دوسوا هنا عشان تشوفوا بوستس أكتر زي دي
وقولولي في كومنت لو جربتوا المجموعة دي
🎀
