رأيي و تجربتي مع صابونة سينوبار لعلاج حب الشباب + المكونات / السعر و صور Synobar soap for acne prone skin

by Reem - January 25, 2019

ازيكوا ♡ ♡

انهاردة اخيرا ,بعد ما كتير منكم طلبوا مني, هاقولكم رأيي في صابونة

SYNOBAR
----
"medicated cleansing soap"
for acne prone skin--

هي صابونة طبية مخصصة للبشرة المعرضة لحب الشباب

جبتها بقالي أكتر من شهر و لحد دلوقتي باستعملها, انا كان بقالي فترة بشرتي بيطلعلي فيها حبوب كتيرة و مش عارفة ليه بس هي حاليا اتحسنت كتيييير عن الأول ماقدرش أقول ان التحسن ده كله بسبب الصابونة بس أنا من أول ما استعملتها لحد دلوقتي ما طلعليش حباية واحدة و محافظة علي بشترتي من انها يرجع يطلع فيها حبوب تاني

طبعا الحبوب مانقدرش نحكم عليها بس من خلال الصابونة بس هي فعلا بتنضف البشرة كويس و الحلو بقي انها مش بتنشفلي بشرتي و ممكن بعد ما اغسل وشي ماستعملش مرطب بس ده طبعا بيعتمد علي نوع البشرة يعني لو بشرتك جافة مثلا ممكن تنشفهالك, انا بشرتي مختلطة و في كذا صابونة و غسول كانوا بينشفولي بشرتي جدا بس الصابونة دي موازنة ما بين تنضيف و الحفاظ علي رطوبة البشرة الي حد ما

اشتريتها من صيدلية ب 14 جنيه -
و باستعملها الصبح مرة و بالليل مرة

الصابونة مخصصة للبشرة الدهنية المعرضة لحب الشباب و المفروض تستعمل مع علاج حب الشباب للحصول علي أحسن النتايج و ده ال انا عملته فعلا و هو اني باستعمل منتج لعلاج حب الشباب بعد ما اغسل وشي بيها و فعلا النتيجة اني مابقاش يظهر حبوب خالص

[ لو عايزني اكتبلكوا برضو عن المنتج ال استعملته قولولي في كومنت ]

المكونات

[معظمها زيوت طيارة مطهرة]

زيت الزعتر ,خلاصة زيت اللافندر ,زيت الصنوبر , زيت القرنفل ,زيت شجرة الشاي - زيوت مطهرة للبشرة -

زيت جنين القمح -

+ Salicylic acid - و ده يعتبر أهم مكون في الصابونة لأنه بينضف البشرة بعمق و دايما هتلاقيه في معظم المنتجات المخصصة لعلاج حب الشباب

ZnO اكسيد الزنك-
صابون و جلسرين -

مكونات بسيطة جدا و معظمها طبيعية بس لازم تاخدي بالك لو عندك حساسية من أي حاجة في المكونات ماتستعمليهاش و لو مش عارفة عندك حساسية ولا لأ جربيها الأول علي ايدك

الصابونة كمان ليها غسول بس ده انا ماجربتوش لكن الصابونة لحد دلوقتي ماعنديش مشكلة معاها و شايفة انها مناسبة جدا ليا و بتقلل ظهور حب الشباب

لو جربتيها هي أو الغسول بتاعها قوليلي رأيك فيها في كومنت و لو جربتي حاجة لحب الشباب و جابت نتيجة كمان قوليلي في كومنت

شوفوا تجربتي مع صابونة سينوبارإس بالكبريت من هنا

♡