Luna Cosmetics: After Sun Lotion Reviewرأيي وتجربتي مع لوشن لونا بعد التعرض للشمس - أفتر صن لوشن مرطب بالصورريفيو مرطب لونا
Luna Cosmetics: After Sun Lotion Review رأيي وتجربتي مع لوشن لونا بعد التعرض للشمس - أفتر صن لوشن مرطب بالصور
Luna Cosmetics: After Sun Lotion Review
رأيي وتجربتي مع لوشن لونا بعد التعرض للشمس - أفتر صن لوشن مرطب بالصور
💕 ازيكوا عاملين ايه
انهارده هكلمكوا عن أفتر صن لوشن من لونا
طبعا الصيف في مصر غني عن التعريف والشمس صعبة جدا
السنة دي قبل المصيف اختي جابت اللوشن ده بعد تجربة مش لطيفة مع الشمس
طبعا انا لما قريت الاسم افتكرته مثلا بيساعد على تفتيح البشرة أو بيمنع اسمرارها بعد التعرض للشمس فبصيت على مكوناته عشان اتأكد بس لقيت ان مافيش في المكونات أي حاجة تعتبر بتستهدف صبغة البشرة لكن كتير من المكونات ملطفة ومهدئة وكمان مفيدة للبشرة بشكل عام
تقدروا تضغطوا على الصورة عشان تشوفوا المكونات بشكل أوضح
المكونات المذكورة على الانبوبة
Glycerin - Vitamin E - Panthenol - Triethanolamine - Cetyl Stearyl Alcohol
وكلهم مكونات مرطبة للبشرة
فهو ممكن يستعمل كمرطب يومي عادي حتى هو مكتوب عليه
Daily use moisturizer
لكن برضو ينفع يستعمل بعد التعرض للشمس لمنع تقشير وجفاف البشرة وعند الشعور بجفاف شديد عامة
هو تركيبة خفيفة مناسبة لكل أنواع البشرة
طبعا انا معرفش هل هو فعلا مناسب لكل الأنواع ولا لأ, بس أنا بشرتي مختلطة ومسببليش مشاكل غير بس انه ممكن يسيب لمعة بسيطة للبشرة لكن مش بحس انه بيخنق بشرتي أبدا
تركيبته مش سايلة بشكل يضايق زي معظم اللوشنز ومش تقيلة ودهنية برضو وده عجبني
هو في العبوة شكله أبيض كدة لكن لما بيتفرد بيبقى شفاف وخفيف على البشرة
باستعمل جزء صغير جدا وبيكفي الوش كله لأنه بيتفرد جامد ومش بابقى محتاجة استعمل كمية كبيرة خالص
أنا مش بحس انه ليه ريحة أصلا بس أختي مثلا مش بتحب ريحته, هو ريحته خفيفة يعني مش بيضايق
أختي محبتش التركيبة وبتقول انها تقيلة على البشرة لكنه بيرطب جدا وفعلا بيهدي البشرة
مرة كانت عامله
sheet mask
من اللي بينشفوا البشرة أوي دول والظاهر انها سابته وقت زيادة عن المطلوب فا بشرتها تحسست واحمرت شوية
قلتلها تستعمل المرطب ده وفعلا هدأ بشرتها واتحسنت
هو في رأيي مش مناسب للخروج مثلا خصوصا للبشرة الدهنية وممكن كمان المختلطة زي بشرتي
لكنه مهدئ ومرطب مناسب لحالات معينة وميضرش ابدا لو جبناه وخليناه للحالات دي زي بعد التعرض للشمس أو في حالات التحسس او الجفاف
ممكن أصحاب البشرة الجافة يستعملوه كمرطب يومي ويبقى مناسب جدا لبشرتهم
أنا مثلا الشمس بتتعب بشرتي جدا, فا قبل ما بانزل باستعمل واقي شمس ولما برجع البيت باغسل وشي واستعمل المرطب ده والروتين ده خلاني استحمل الصيف شوية زيادة عن الأول
في الاخر رأيي انه مرطب أساسي ومش غالي أوي أنا فاكرة ان أختي جابته من الصيدلية ب50 جنيه
عامة أنا شخصيا باحب اتابع منتجات لونا وأشوف هم بينزلوا ايه جديد لأنها على حد علمي شركة مصرية وباحب البساطة في منتجاتهم زي مثلا مجموعة المرطبات الجديدة اللي نزلت بزبدة الكاكاو (ممكن تشوفوا رأيي فيها من هنا) ومن ساعة ما جربتها حبيت منجاتهم
أنا ماحبيتش زبدة الكاكاو بتاعتهم عامة بصراحة لكن رأيي انهم بيعملوا تركيبات مرطبة للوشن والكريم حلوة أوي بمكونات بسيطة وفعالة من غير تكلف
قولولي في كومنت, ايه رأيكوا في منتجات لونا؟
وشوفوا باقي المنتجات اللي جربتها من هنا
0 comments