مرطب لونا اليومي للجسم واليدين بزبدة الكاكاو Luna emollient cocoa butter hand & body moisturizing cream ريفيو| رأيي وتجربتي + صور

by Reem - June 08, 2020

ازيكوا عاملين ايه؟
انهاردة هكلمكوا عن كريم لونا المرطب للجسم و اليدين

بقاله فترة عندي بس مكنتش بستعملوا خالص, أختي كانت جايباه عشان كانت محتاجة مرطب حجمه صغير تقدر تاخده معاها الشغل و مايخدش مكان في الشنطة ده غير انه سعره كان بسيط أوي, لكن في الاخر طبعا مكانتش بتستعمله كتير كان احتياطي كدة لحد ما أنا في مرة مسكته وفضلت اتفرج عليه, أنا عموما بحب أقرا المكونات واتفرج على منتجات التجميل ومميزاتها يعني عندي فضول وكمان عشان ده من مجال دراستي

طبعا جربته وبصراحة أول حاجة لاحظتها ريحته. ريحتة جميلة جداااا وطبعا دي بتكون اذواق وممكن ماتعجبش ناس تانية بس أنا فعلا حبيتها جدا خصوصا اني بحب ريحة الجوز هند بس هي مش ريحة جوز هند بس, هي خليط من روايح كتير بس جوز الهند أقوى ريحة فيهم وده عجبني جدا

حبيت كمان ان مكوناته بسيطة نوعا ما مقارنة بمنتجات تانية بتكون مليانة كيماويات مش مضمونة ودي حاجة مهمة جدا بالنسبة لي

لازم أعرف المنتج اللي بستعمله مكون من ايه و بيعمل ايه بالظبط وطبعا مش كل حاجة بعرفها بس على الأقل 70% من المكونات لازم تكون مضمونة بالنسبة لي غير كدة مش بستعمله

دي المكونات, ممكن ندوس على الصورة عشان نكبرها

حجمه كمان مش كبير وأقدر اخده معايا في شنطتي ده غير اني هبقى مطمنة انه مش هيتدلق لأنه مش في علبة وقوامه كثيف مش سائل. هو طبعا مرطب دهني مكون من زيت جوز الهند ,زبدة الكاكاو وزيت الجوجوبا ودول مكونات دهنية مغذية وبتحافظ على رطوبة البشرة لكن كمان فيه جلسرين وده بيرطب البشرة بشكل كبير

المرطب ده بيسيب طبقة ناعمة على الجلد وبيديه رطوبة لكن يمكن عيبه الوحيد بالنسبة لي أنا انه ملزق شوية يعني مش بينسجم مية في المية مع الجلد
حاجة كمان, مكوناته فيها بيرفيوم
"Perfume"
ودي ممكن تدايق اصحاب البشرة الحساسة أو المتشققة لكن أنا شخصيا النقطة دي ماسببتليش مشكلة, بالعكس حبيت الريحة جدا
طبعا نقطة التحسس ممكن تبقى من مكونات كتير مش بس البرفيوم فا الأفضل ان أصحاب البشرة الحساسة تجربته في جزء محدود جدا من البشرة الأول ومتابعة حالة الجلد قبل استعماله على أجزاء أكبر ويفضل ان اصحاب البشرة الملتهبة أو المتشققة أو اللي عندهم إكزيما ميستعملهوش

بستعمله بس لترطيب ايديا بعد الغسيل وبيكون مناسب جدا للاستعمال اليومي
طبعا المرطب بالنسبة لسعره مناسب جدا خصوصا للاستعمال المستمر لترطيب اليدين خلال اليوم
لو جربتيه قوليلي رأيك في كومنت تحت
شوفي كل المنتجات اللي جربتها من هنا
♡