رأيي و تجربتي مع منتجات نفرتاري للعناية بالبشرة Nefertari natural body care products : زيت بذر العنب و صابون الروزماري

by Reem - October 03, 2019

رأيي و تجربتي مع منتجات نفرتاري للعناية بالبشرة
Nefertari natural body care products
زيت بذر العنب و صابون الروز ماري
...

جايبالكوا انهاردة اتنين من منتجات نفرتاري استعملتهم بقالي فترة و قلت اكلمكم عنهم. منتجات نفرتاري في الفترة الأخيرة بقت منتشرة و بقيت باشوفها كتير و قلت أجربها, أنا شخصيا باحب جدا المنتجات الطبيعية
(بما اني في صيدلة و مهتمة بالزيوت و منتجات التجميل و كدة..)

كنت بقالي فترة بادور على زيت مناسب لنوع بشرتي و يكون مابيسدش المسام ويطلع حبوب فا انا دايما باحب اقرا عن انواع الزيوت و بيشتغلوا ازاي و فوايدهم ايه للبشرة و توصلت لان زيت بذر العنب من أحسن أنواع الزيوت للحفاظ على شباب و نضارة البشرة و بيرطب و فوق كل ده مابيطلعش حبوب لأنه
non-comedogenic
و طبعا أنا أول ماشفت ان نفرتاري بيقدموا أنواع زيوت طبيعية فا جبت زيت بذر العنب من عندهم و جبت كمان صابون الروزماري أجربه

أخدت الزيت مع الصابون في كيس ورق بصراحو عجبني جدا حسيته
classic كدة و لايق علي المنتجات الطبيعية ال بيقدموها

الزيت أنا كنت باستخدمه بالليل طبعا ماحبتش استخدمه الصبح لان بشرتي خصوصا في الصيف بتكون دهنية أكتر ده غير ان الزيت بيكون ليه ريحة مش لطيفة أوي فا باستخدمه بعد ماغسل وشي بالليل قبل النوم كمرطب و باستنى شوية قبل النوم لحد ما معظمه يمتص

تاني يوم الصبح بلاحظ ان وشي ناعم جدا و بشرتي طرية و هو فعلا طول الوقت ال استعملته فيه ماسببليش مشاكل مع حب الشباب

من أحسن الزيوت ال استعملتها فعلا بيرطب بعمق و بيخلي البشرة نضرة جدا, بيفكرني بزيت الجوجوبا ال جربته قبل كدة.

جبته ب 90 جنيه مش عارفة ده لسة سعره ولا لأ

Rosemary Soap

أما بقى بقي الصابون كان أربعة مع بعض بس أنا ماعجبنيش الصابون خالص. أنا دايما باستعمل صابونة لحب الشباب بس فكرت أغير و استعمل دي بس بصراحة ماكملتش 5 أيام و رجعت لصابون حب الشباب علي طول

مشكلتها مش انها مادتنيش نفس نتيجة صابون حب الشباب بس , كنت بعد حوالي استعمالين ألاقي الصابونة سايحة خالص مش ماسكة نفسها و مبهدلة الحوض و انا مش عارفة امسكها استخدمها لان قوامها مش متماسك فا كنت بارميها قبل ما تخلص بكتير

الزيت عجبني جدا و الصابون مش هاستعمله تاني
قوليلي جربتي منتجات نفرتاري؟
لو اه قوليلي جربتي ايه تحت في كومنت و عجبك ولا لأ

شوفي كل المنتجات الجربتها من هنا
- ريم